Luke 23

Iesu Pilato vairanai

1Bena hebou taudia iboudiai e tore isi, Pilato dekena e hakaua lao. 2E habadelaia matama, eto, Ina tau a davaria, emai bese taudia lalodia e ani, Kaisara ena tax monina ihenina e gwaua tao, bona sibona e hegwauraimu e tomu ia na Keriso, pavapava ta.

3Bena Pilato ese e nanadaia, eto, Oi na Iuda taudia edia pavapava a? Iesu e haere, eto, O ena vada o gwaumu. 4Pilato ese hahelaḡa taudia bona aru taudia e hamaorodia, eto, Kerere ta asina davaria ina tau enai. 5To idia na e hereva goadagoada, eto, Ia na ena hahediba herevadia ai Iudea idoinai vada e haheloḡo-heloḡoa, Galilea amo e matamaia ema bona ina hanua. 6Pilato ese una hereva e kamonai, bena e henanadai, eto, Ina Galilea tauna a? 7Bena ia dibana ia na Herod ena kaha tauna dainai, ia ese Herod dekena e siaia lao, badina be una negana ai ia na Ierusalem ai.

Iesu Herod vairanai

8Herod ese Iesu e itaia, bena e moale bada; badina be nega daudau Iesu harina e kamonaiva, bena e urava bema itaia bona Iesu ese toa ta bema karaia bena bema itaia e tomava. 9Bena hereva diaḡau e nanadailaia, to Iesu na se haere. 10Hahelaḡa taudia bona itorena taudia unuseni ai e gini, e habadelaia goadagoada. 11Bena Herod bona ena tuari taudia ese ia e kirikirilaia, e ḡonagonalaia, dabua namo-hereana ta e hadokilaia, bena Pilato dekena e siaia lou lao. 12Una dina ai Pilato bona Herod vada e herohemaino; badina be gunaguna idia raruosi e heinai heheniva.

Iesu nega iharuana Pilato vairanai

13Bena Pilato ese hahelaga taudia bona hanua lohiadia bona hanua taudia e boiridia, 14e hamaorodia, eto, Ina tau o mailaia, oto ia ese hanua e haheloḡoamu; a lau ese umui vairamui ai o habadelaia herevadia vada name tahu, to ena kerere ta asiname davaria. 15Herod danu unuheto; una dainai ia ese ma e siaia lou ita dekedai. Benaini, ia ese mase karana ta se karaia; 16namo, aina dadabaia, ma baina ruhaia nege. 17Badina be vaia ena kara una aria negana ai dibura rumana ai noho tauna ta baine ruhaia nege.

18Bena iboudiai e lolo bou, eto, Ina tau na herevana. Baraba hari ba henimai. 19Una na heatu bona ala-ala hanua lalonai e havaraia dainai dibura rumana ai e koua tauna.

20Pilato ma e hereva henidia lou, Iesu baine ruhaia nege eto; 21to idia ma e lolo, eto, Ba hasatauroa, ba hasatauroa.

22Nega ihatoina ma e hereva henidia, eto, Ina tau ena dika be dahaka? Lau na mase badina ta ienai asina davaria. Vada baina dadabaia, bena baina ruhaia nege. 23To idia na e lolo lalo-dika, eto, Ba hasatauroa. Bena idia eredia vada e kwalimu. 24Bena Pilato ese edia ura heḡereḡerena e karaia: 25hari heatu bona ala-ala dainai dibura rumana ai e nohova tauna e ruhaia nege, edia noinoi heḡereḡerena; a Iesu na e henidia, edia ura bae karaia.

Iesu e hasatauroa

26Idia ese Iesu e hakaua lasi, bena Simona, Kurene tauna ta, gunika amo lasina ai e dabaia tao, satauro na ia paḡana ai e atoa kau, Iesu murina amo baine huaia. 27Taunimanima hutuma na ia murinai e raka, bona hahine haida rakadia ai e tai hetutu. 28Bena Iesu e gini kerehai, e hereva henidia, eto, Ierusalem hahinemui e, lau taigu asio tai, a sibomui hari ba hetai heheni, bona natumui taidia hari ba tai. 29Badina be negana be maimu baeto “Gabani hahinedia bona ratadia asie topo hahinedia hari nanamo”. 30Una negana ai ororo badadia bae hereva henidia, baeto “A kuremai tao”; bona ororo maraḡidia bae hamaorodia, baeto “A gorumai tao”. 31Badina be au maurina ini e karaia tomamu, matona kakorona na ede bae tomaia?

32Kara dika taudia rarua danu ia ida e hakaudia lasi, bae hasataurodia hebou.

33Gabu ta ai e kau, ladana na Kwara Koukouna; unuseni ai e hasatauroa. Hari kara dika taudia danu, ta idibana kahana ai, ta laurina kahana ai, e hasataurodia. 34Bena Iesu e ḡuriḡuri, eto, Tamagu e, ina e karaiamu karana na asi dibadia, davadia na basio henidia. Bena ena dabua e hari, mari ai ta ta ahudia e abi. 35Hanua taudia na e gini, e herarai. Bona hanua lohiadia ese e kirikirilaia, eto, Ia na idau taudia e hamauridiava; bema Dirava ena Keriso, ena abi-hidi tauna, ia na sibona bema hahemauri. 36Tuari taudia ese e ḡonagonalaia, e raka kahira, vine ranuna iditana e duduia dae, eto, 37Oi na Iuda taudia edia pavapava o tomu, matona sibomu ba hahemauri. 38Revareva ta danu e torea, ia daenai e kapaia, eto: IUDA TAUDIA EDIA PAVAPAVA.

39Bena ia ida e hasataurodia hebou taudia ta ese e ḡonaḡonalaia, eto, Oi na dia Keriso a? Sibomu a hahemauri; ai danu a hamaurimai. 40A bamona ese e gwau henia, eto, Dirava garina to garimu a? Oi danu bo masemu, ia heḡereḡerena. 41Ḡau tamona, ita raruosi baita mase eda kara dika davana, a ina tau na asi ena kerere. 42Bena ia eto, Iesu e, emu basileia bavabia negana ai, ba lalogu. 43Iesu eto, Na hamaoromu momokanimu, hari dina ai ita raruosi Paradiso ai baita kau.

44Una na dina tubua: bena unu amo ela dina ḡelona una tano idoinai vada e dibura; 45dina e ḡovaia ahu, bona Dubu Helaḡa seseahuna na bogaragina amo e hedare parara. 46Bena Iesu e boi lolo, eto, Tamagu e, laumagu na oi imamu ai na atoamu. Unu e gwau toma, bena vada e mase. 47Tuari biaguna ese una kara e itaia, bena ia ese Dirava e imodaia, eto, Ina tau na kara maoromaoro tauna. 48A herarai taudia hutuma ese unu e vara ḡaudia e ita, bena kemedia e pata, bona hanua e lou henia. 49Ia bamona bona Galilea amo e ḡavaia hahinedia na dauhai ginidia ai e herarai.

Iesu e ḡuria

50Kaunsil tauna ta, ladana Iosef, tau namona bona kara maoromaoro tauna, e nohova. 51Ia na kaunsil edia henega ai bona edia kara ai se vareai. Ia na Iudea hanuana ta, ladana Arimatea, tauna; ia danu Dirava ena basileia e nariava.

52Bena ia na ela, Pilato dekenai, Iesu tau-anina e noia. 53Bena e abia dobi, dabua aukana ai e kumia, nadi hagana ai e ḡeia kohuana lalonai e atoa. Una kohua na matamatana; lalonai tau ta do asie ḡuria. 54Haheḡoeva dinana bunai: Dina Helaḡa vada e kahikahi.

55Bena Galilea amo e ḡavaia hahinedia na idia muridia amo ela, kohua e itaia, bona tau-anina unuseni ai e ḡuria danu e itaia kau. 56Bena e lou lao, muramura mai bonadia bona dahudahu muramuradia e abi heḡaeḡae. A Dina Helaḡa ai laḡadia e ani, taravatu dainai.